今季馬季話咁快已經臨近尾聲，轉眼間已經只剩二十次左右。馬仔抖暑果一個半月，賭仔可以做D咩？大家會點為下季賭馬作出準備，來季斬殺狗會？
嚮第一年玩馬仔後，我曾經on99咁嚮暑假寫過程式去拎馬會三年賽事資料研究，個程式大概足足行左幾日。但係拎完資料之後，發覺無從入手，亦都睇唔到由邊一個參數(跑道、騎師、馬房、負磅…)入手研究好，所以拎完D資料都無乜詳細研究。
之後兩年，雖然賭馬多左，但人大左亦都懶左，唔係幾想諗野。但係玩馬多左，發覺太舊既資料根本無用，最簡單，騎師同練馬師每年都改變緊，所以指向性不大。再者狗會網站更新後，我個程式都行唔到，所以無再搞個程式。
呢兩年暑假，我轉為睇最近一季既馬仔評分升跌，因為搵到評分有利既馬，嚮季初好多時都搵到食。馬房好多時有D馬可能用成季時間減分，到新一季先搵食。同時亦都睇下有無咩跑近過但名次長期都後既馬，呢D都有成為新一季食餬既冷馬潛質。
嚮睇既時侯，我都會整理埋果堆馬既資料去自己既 Google Sheet，同時記錄低邊隻馬值得下季追，之後來季用 EXCEL Formula 同排位表對。但一季都有大約 1300 隻馬要睇，都幾乎要睇同整足三個禮拜。
雖然唔係場場得，但有時都扑到冷馬。
而家大數據年代，個個都話 BIG DATA 同 AI，可能遲D都要諗下 AI 幫唔幫到手，初步可能試下用 TensorFlow 玩下，但係要睇下有無時間玩先得。